ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ ᓄᓇᕗᑦ ᒪᓕᒐᓕᐅᕐᕕᐊᓄᑦ ᑎᒃᑯᐊᖅᑕᐅᓯᒪᔪᖅ. ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᒋᔭᐅᓐᖏᑦᑐᖅ, ᐊᒻᒪᓗ ᑕᐃᒪᐃᓐᓂᖓᓄᑦ, ᐃᓱᒪᓕᐊᖏᑦ ᒐᕙᒪᒃᑯᓐᓄᑦ ᐊᒃᑐᐃᓂᖃᓐᖏᖢᑎᒃ ᐋᖅᑭᖃᑦᑕᖅᑕᖏᑦ. ᑕᐃᒪᐃᓐᓂᖓᓄᑦ, ᓇᓕᐊᖕᓄᑐᐃᓐᓇᖅ ᐊᒃᑐᐊᓂᖃᓐᖏᖢᓂ ᐃᓱᒪᓕᐅᕈᓐᓇᖅᑐᖅ ᐱᔭᒃᓴᖅᑖᕆᓯᒪᔭᖏᑦ ᐱᖁᔭᕐᔪᐊᑉ ᐃᓗᐊᓃᑦᑐᑦ ᐊᑐᖅᖢᓂᒋᑦ.

ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ ᕿᒥᕐᕈᓇᖁᒍᕕᐅᒃ ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖏᑦᑕ ᐃᓱᒪᓕᐊᕆᓚᐅᖅᓯᒪᔭᖏᓐᓂᒃ ᐱᔾᔪᑎᓕᖕᓂᒃ ᐊᒻᒪᓗ ᑐᓴᐅᒪᔾᔪᑏᑦ ᑐᒃᓯᕌᕋᓗᐊᖅᑎᑦ ᖃᐃᑕᐅᔪᒪᓚᐅᓐᖏᓐᓂᖅᐸᑕ, ᐅᕝᕙᓘᓐᓃᑦ ᐃᓕᖕᓄᑦ ᑐᕌᖓᔪᑦ ᑐᓴᐅᒪᔾᔪᑏᑦ ᑐᓐᓂᖅᑯᑕᐅᓐᓂᖅᐸᑕ ᐊᓯᖕᓄᑦ ᑐᓂᔭᐅᖁᓐᖏᒃᑲᓗᐊᖅᑎᓪᓗᒋᑦ, ᑲᒥᓴᓇᒧᑦ ᑎᑎᕋᖅᓯᒪᔪᒃᑯᑦ ᑐᒃᓯᕋᐅᓯᐅᕆᐊᖃᖅᑐᑎᑦ ᐅᓪᓗᑦ 30 ᑐᖔᓂ ᖃᐅᔨᒃᑲᖅᑕᐅᓚᐅᖅᑎᓪᓗᑎᑦ ᒐᕙᒪᒃᑯᑦ ᐃᓱᒪᓕᐅᕈᑎᒋᓚᐅᖅᑕᕕᓂᖏᓐᓂᒃ.

Click here ᑕᑯᔪᒪᒍᕕᑦ ᖃᓄᖅ ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ ᖃᐅᔨᒋᐊᕐᕕᒋᔪᓐᓇᕈᒪᒍᕕᐅᒃ. . Click here

ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ ᑭᒃᑯᑐᐃᓐᓇᕐᓂᒃ ᐱᕕᖃᖅᑎᑦᑎᑦᑎᐊᕐᓂᐊᖅᑐᖅ ᐅᓂᒃᑳᖅᑎᓪᓗᓂᒋᓪᓗ ᓱᖕᒪᑦ ᑐᓴᐅᒪᔾᔪᑏᑦ ᓴᖅᑭᑕᐅᔭᕆᐊᖃᕐᒪᖔᖏᑦ ᓴᖅᑭᑕᐅᔭᕆᐊᖃᓐᖏᒻᒪᖔᖏᓪᓘᓐᓃᑦ. ᑐᑭᓯᐊᓂᒃᑯᓂ ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖏᓐᓄᑦ ᐊᑐᓕᖁᔭᓕᐅᕐᓂᐊᖅᑐᖅ ᑎᑎᖅᑲᑦ ᕿᒥᕐᕈᓇᓚᐅᖅᑕᓂ ᐊᑐᕐᓗᓂᒋᑦ ᐊᒻᒪᓗ ᐱᖁᔭᕐᔪᐊᖅ.
ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖏᑦ ᐱᔪᒪᒍᑎᒃ, ᐊᑐᓕᖁᔭᓕᐊᖏᓐᓂᒃ ᐊᖏᖅᓯᔪᓐᓇᖅᑐᑦ, ᐋᒃᑳᕈᓐᓇᖅᑐᑦ ᐅᕝᕙᓘᓐᓃᑦ ᐊᓯᖔᖏᑦᑎᒎᖓᔪᓂᒃ ᐃᓱᒪᓕᐅᕈᓐᓇᖅᑐᑦ ᖃᓄᖅ ᑕᒪᓐᓇ ᑲᒪᒋᔭᐅᓂᐊᕐᒪᖔᖓ.

ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖓᑦᑕ ᐃᓱᒪᓕᐊᖓ ᐱᐅᒋᓐᖏᒃᑯᖕᓂ ᑕᒪᓐᓇ ᐊᑐᕆᐊᖃᖅᑐᖅ ᐊᑐᖅᑕᐅᕌᓂᒃᓯᒪᓕᖅᑎᓪᓗᒍ, ᐱᔪᒪᒍᕕᑦ, ᓄᓇᕗᒻᒥ ᐃᖅᑲᖅᑐᐃᕕᓕᕆᔨᒃᑰᖔᕈᓐᓇᖅᑐᑎᑦ ᑕᒪᓐᓇ ᐃᓱᒪᓕᐅᕈᑕᐅᓂᐊᕐᒪᑦ ᐊᓯᔾᔨᕈᓐᓇᓐᖏᑎᑕᐅᓯᒪᓗᓂ.

ᑐᒃᓯᕌᑦ:

ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ ᑐᒃᓯᕋᕐᕕᒋᒍᖕᓂ ᕿᒥᕐᕈᓇᖁᓗᒍ ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖏᑦᑕ ᐋᒃᑳᓚᐅᕐᓂᖓᓅᖅᑐᓂᒃ, ᐊᑭᖃᓐᖏᑦᑐᖅ.