ᑐᓴᐅᒪᔾᔪᑎᓂᒃ ᑕᑯᔪᒪᓂᕐᒧᑦ ᑐᒃᓯᕋᐅᓯᐅᕈᕕᑦ, ᒐᕙᒪᒃᑯᑦ ᐱᓕᕆᕝᕕᖓᑦ ᑎᒥᓐᖑᖅᑎᓯᒪᔭᖓᓪᓘᓐᓃᑦ ᖃᐅᔨᒋᐊᕐᕕᒋᔪᓐᓇᖅᑕᑎᑦ ᑐᓴᐅᒪᔾᔪᑏᑦ ᐱᔪᒪᔭᑎᑦ ᐅᖃᐅᓯᕆᓗᒋᑦ, ᐅᖃᐅᓯᒃᑯᑦ ᑐᒃᓯᕌᑎᑦ ᐱᓐᖏᓐᓂᕈᕕᒋᑦ, ᑎᑎᕋᖅᓯᒪᔪᒃᑯᑦ ᑐᒃᓯᕋᐅᓯᐅᕈᓐᓇᖅᑐᑎᑦ, ᓇᓗᓇᐃᔭᑦᑎᐊᕐᓗᒋᓪᓗ ᑕᐃᒃᑯᐊ ᑎᑎᖅᑲᑦ ᑕᑯᔪᒪᔭᑎᑦ. ᑐᓴᐅᒪᔾᔪᑏᑦ ᑐᒃᓯᕌᕆᔭᑎᑦ ᐃᓕᖕᓄᑦ ᑐᕌᖓᓐᖏᑉᐸᑕ, ᐊᑭᓖᒐᓛᒋᐊᖃᕐᓂᐊᖅᑐᑎᑦ $25.00-ᒥᒃ ᑐᒃᓯᕋᐅᓯᐊᕆᔭᕐᓄᑦ.

ᑐᑭᓯᒋᐊᕈᒪᒍᕕᑦ ᑭᓇᒧᑦ ᐅᖃᕈᓐᓇᕐᒪᖔᑦ, ᑕᑯᒋᐊᕈᓐᓇᖅᑕᐃᑦ ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑐᑭᒧᐊᒃᑎᑦᑎᔨᓄᑦ ᑐᕌᖓᔪᖅ ᖃᕆᓴᐅᔭᒃᑰᖅᑎᓯᒪᔭᕗᑦ

ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖓᑦ ᑐᒃᓯᕋᐅᒻᒥᒃ ᐱᔪᑦ ᐅᓪᓗᑦ 30-ᓂᒃ ᐱᕕᖃᖅᑐᑦ ᑭᐅᕝᕕᒃᓴᒥᒃ. ᑖᓐᓇ 30-ᓄᑦ ᐅᓪᓗᓄᑦ ᐋᖅᑭᒃᓯᒪᔪᖅ ᐅᖓᕙᕆᐊᖅᑕᐅᔪᓐᓇᖅᑐᖅ ᑐᓴᐅᒪᔾᔪᑏᑦ ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖏᓐᓄᑦ ᐸᐸᑕᑦ ᐃᓗᓕᖃᐅᓐᖏᓗᐊᖅᐸᑕ, ᐅᓄᓗᐊᖅᐸᑕᓘᓐᓃᑦ ᑎᑎᖅᑲᖁᑏᑦ ᕿᓂᖅᑕᐅᔭᕆᐊᓖᑦ, ᐅᕝᕙᓘᓐᓃᑦ ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖓᑦ ᐊᓯᐊᓄᑦ ᐅᖃᖃᑎᖃᕆᐊᖃᕈᑎᒃ ᑐᓴᐅᒪᔾᔪᑏᑦ ᑐᓐᓂᖅᑯᑕᐅᓚᐅᓐᖏᓐᓂᖏᓐᓂ.

ᐱᖁᔭᕐᔪᐊᑦ ᐅᖃᖅᓯᒪᔪᑦ ᓂᐱᓕᐅᖅᑕᐅᓯᒪᔪᑦ ᑐᓴᐅᒪᔾᔪᑏᑦ ᐱᖁᔭᕐᔪᐊᖅᑎᒎᖅᑎᑕᐅᓂᖏᓐᓂᖏᓐᓂ, ᐊᒻᒪᓗ ᑕᐃᒪᐃᓐᓂᖓᓄᑦ, ᑐᓴᐅᒪᔾᔪᑏᑦ ᑐᒃᓯᕌᕆᔭᐅᓂᖏᑦᑕ ᐱᐅᓯᖏᑦᑎᒎᖅᑎᑕᐅᔪᓐᓇᓐᖏᖢᑎᒃ. ᐊᒻᒪᓗᒃᑲᓐᓂᖅ, ᐱᖁᔭᕐᔪᐊᖅᑎᒍᑦ ᓇᓗᓇᐃᔭᐃᓯᒪᔪᑦ ᓇᓕᐊᒃ ᐃᓱᒪᖅᓲᑕᐅᔪᓐᓇᓐᖏᒻᒪᖔᑦ ᓇᓕᐊᒡᓗ ᐃᓱᒪᖅᓲᑕᐅᓗᑎᒃ ᑐᓐᓂᖅᑯᑕᐅᔪᓐᓇᕐᒪᖔᖏᑦ.

ᐃᓱᒪᖅᓲᑕᐅᔪᓐᓇᓐᖏᑦᑐᑦ ᐊᑐᕐᓗᓕᒋᑦ, ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖓᑦ ᐋᒃᑳᕆᐊᖃᖅᐳᖅ ᑐᒃᓯᕋᖅᑐᖃᕋᓗᐊᖅᐸᑦ ᑕᒪᒃᑯᐊ ᐃᓗᐊᒎᖅᑐᓂᒃ. ᐅᑯᐊᖑᕗᑦ ᐃᓚᖏᑦ:

• ᒥᓂᔅᑕᐃᑦ ᑎᑎᖅᑲᖁᑎᖏᑦ;
• ᒐᕙᒪᒃᑯᑦ ᐊᓯᐊᖏᑦᑎᒎᖅᑐᑦ ᑐᓴᐅᒪᔾᔪᑏᑦ ᑲᓐᖑᓇᖅᑑᑎᑕᐅᓂᐊᖅᓯᒪᓪᓗᑎᒃ ᑐᓐᓂᖅᑯᑕᐅᔪᕕᓃᑦ ᐊᒻᒪᓗ ᓴᖅᑭᑕᐅᒃᐸᑕ ᒐᕙᒪᒃᑯᑦ ᐊᓯᐊᖏᑦᑎᒎᖅᑐᑦ ᖃᓄᐃᓕᔭᐅᕝᕕᖃᕈᓐᓇᖅᓯᓗᑎᒃ;
• ᐃᓄᖕᒧᑦ ᑐᕌᖓᔪᑦ ᐃᒻᒥᒨᖅᑐᑦ ᑐᓴᐅᒪᔾᔪᑏᑦ ᑐᒃᓯᕋᖅᑑᑉ ᐊᓯᐊᓄᑦ ᑐᕌᖓᓂᓖᑦ
• ᒐᕙᒪᒃᑯᑦ ᐊᓯᐊᖏᑦᑎᒎᖅᑐᑦ ᐱᓯᓂᓯᖃᕐᓂᖏᓐᓄᑦ ᑐᕌᖓᔪᑦ

ᐃᓱᒪᖅᓲᑕᐅᔪᓐᓇᖅᑐᑦ ᐊᑐᖅᖢᒋᑦ ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖏᑦ ᐃᓱᒪᓕᐅᕈᓐᓇᖅᑐᑦ ᑐᒃᓯᕌᕆᔭᐅᔪᓄᐊᖓᔪᑦ ᓴᖅᑭᑕᐅᓂᐊᕐᒪᖔᖏᓐᓂᒃ. ᐅᑯᐊᖑᕗᑦ ᐃᓚᖏᑦ:

• ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖏᑦᑕ ᐃᖅᑲᓇᐃᔭᖃᑎᒌᒍᓯᖏᓐᓅᖓᔪᑦ, ᑐᓴᐅᒪᔾᔪᑏᑦ ᑲᓐᖑᓇᖅᑑᑎᑕᐅᓪᓗᑎᒃ ᑐᓐᓂᖅᑯᑕᐅᓚᐅᖅᐸᑕ;
• ᑎᒥᓐᖑᖅᑎᑕᐅᓯᒪᔫᑉ ᐃᓗᐊᓂ ᖃᐅᔨᒪᐅᑏᑦ ᐊᑐᓕᖁᔭᓪᓘᓐᓃᑦ
• ᒪᓕᒐᑦ ᐊᑐᓕᖅᑎᑕᐅᓂᖏᑦ;
• ᑎᑎᖅᑲᑦ ᒪᓕᒐᕐᓂᐊᖅᑎᒧᑦ/ᐃᑲᔪᖅᑕᐅᔫᑉ ᐱᔪᓐᓇᐅᑎᖏᓐᓂᒃ ᐊᒃᑐᐃᓂᖃᑐᐃᓐᓇᕆᐊᓖᑦ;
• ᑐᓴᐅᒪᔾᔪᑏᑦ ᑮᓇᐅᔭᓕᕆᓂᕐᒧᑦ ᐊᐳᖅᑕᐅᑎᓐᖑᑐᐃᓐᓇᕆᐊᓖᑦ ᐊᓯᖏᓪᓘᓐᓃᑦ ᑎᒥᓐᖑᖅᑎᑕᐅᓯᒪᔪᒧᑦ ᑐᕌᖓᔪᑦ;
• ᑐᓴᐅᒪᔾᔪᑏᑦ ᐊᒃᑐᐃᓂᕐᓘᑎᖃᑐᐃᓐᓇᕆᐊᓖᑦ ᐃᓅᑉ ᐋᓐᓂᐊᖃᕐᓇᓐᖏᑦᑐᒦᑦᑐᓐᓇᕐᓂᖓᓄᑦ ᐊᑦᑕᓇᐅᑎᓐᖑᑐᐃᓐᓇᕆᐊᓕᓪᓘᓐᓃᑦ;
• ᑐᓴᐅᒪᔾᔪᑏᑦ ᑕᖅᑲᒃᑯᓄᖓ ᐊᑐᐃᓐᓇᕈᖅᑎᑕᐅᓯᒪᓕᕇᖅᑐᑦ ᓴᖅᑭᑕᐅᓴᕋᐃᓐᓂᐊᑐᐃᓐᓇᖅᑐᓪᓘᓐᓃᑦ.

ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖏᑦ ᐃᓱᒪᓕᐅᕐᓂᕈᑎᒃ ᑐᒃᓯᕌᕐᓂᒃ ᖃᐃᑦᑎᔾᔮᓐᖏᓐᓂᕐᒥᖕᓂᒃ, ᓇᓗᓇᐃᖅᓯᑦᑎᐊᕆᐊᖃᖅᑐᑦ ᐃᓕᖕᓄᑦ ᓱᖕᒪᑦ ᓴᖅᑭᑦᑎᔪᒪᓐᖏᒻᒪᖔᕐᒥᓂᒃ ᑐᒃᓯᕌᕆᓚᐅᖅᑕᕐᓂᒃ. ᑭᐅᔾᔪᑖ ᐱᐅᒋᓐᖏᒃᑯᖕᓂ, ᐊᖏᖃᑎᒋᓐᖏᒃᑯᖕᓂᓗ ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖏᑦᑕ ᑐᑭᓕᐊᖏᓐᓂᒃ ᐱᖁᔭᕐᔪᐊᑉ ᐃᓗᓕᖏᓐᓃᑦᑐᓂᒃ, ᐅᕝᕙᓘᓐᓃᑦ ᑐᓴᐅᒪᔾᔪᑏᑦ ᐃᓚᑰᓇᓱᒋᒍᕕᒋᑦ ᑐᒃᓯᕋᓚᐅᖅᑕᑎᑦ, ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ ᕿᒥᕐᕈᓇᖁᔪᓐᓇᖅᑕᐃᑦ ᐃᓱᒪᓕᐊᕆᔭᐅᓚᐅᖅᑐᒥᒃ ᒐᕙᒪᒃᑯᓐᓄᑦ.

ᑭᓇᑐᐃᓐᓇᖅ ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖏᓐᓂᒃ ᑐᒃᓯᕋᕐᓂᖅᐸᑕ ᑐᓴᐅᒪᔾᔪᑎᓂᒃ ᐃᓕᖕᓄᑦ ᑐᕌᖓᔪᓂᒃ, ᒐᕙᒪᒃᑯᑦ ᐃᓕᖕᓂᒃ ᖃᐅᔨᒃᑲᐃᖅᑳᕆᐊᓖᑦ ᓴᖅᑭᑦᑎᓂᐊᕐᓂᕐᒥᖕᓂᒃ ᑐᓴᐅᒪᔾᔪᑎᓂᒃ ᐃᓕᖕᓅᖓᔪᓂᒃ. ᑐᓴᐅᒪᔾᔪᑏᑦ ᐃᓕᖕᓄᑦ ᑐᕌᖓᔪᑦ ᓴᖅᑭᑕᐅᓂᐊᕐᓂᖓ ᐊᑲᐅᒋᓐᖏᒃᑯᖕᓂ, ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ ᕿᒥᕐᕈᓇᖁᔪᓐᓇᖅᑕᐃᑦ ᑐᓴᐅᒪᔾᔪᑏᑦ ᐃᓕᖕᓄᑦ ᑐᕌᖓᔪᑦ ᓴᖅᑭᑕᐅᔪᒪᓂᖏᑦᑕ ᒥᒃᓵᓄᑦ. ᑲᒥᓴᓇ ᑭᓯᐊᓂ ᕿᒥᕐᕈᓇᒐᓱᖕᓂᓕᒫᖓᓂ ᑐᓴᐅᒪᔾᔪᑏᑦ ᖃᓄᐃᑦᑐᑐᐃᓐᓇᐃᑦ ᓴᖅᑭᑕᐅᔪᓐᓇᓐᖏᑦᑐᑦ.